Lucrèce Borgia, Victor Hugo

Promié sène

Zènzan kranèr, dann zot pli zoli linz, i tyinbo zot mask dan la min, la pou koz sou la varang. Gubetta, Gennaro abiyé an kapitène, don Apostolo Gazella, Maffio Orsini, Ascanio Petrucci, Oloferno Vittellozzo, Jeppo Liveretto.

OLOFERNO

Dann tan koméla domoun i fé télman mové zafèr, i koz pi sad la, soman na poin pou di, na poin rien la fine arivé, osi mové, osi kashièt.

ASCANIO

In zistoir lo diab, domoun lo diab la fé.

JEPPO

Amwin mi koné kosa la éspasé, banna. Léminans mon kouzin kardinal Carriale, la done amwin le bout, na poinn inn i koné plis ke li. Zot i koné, kardinal Carriale, sak la lèv dobout dovan kardinal Riario kan té koz fé la gèr Charles III, roi la Frans ?

GENNARO i bay

Aya. Ala Jeppo i sa komans rakont zistwar listoir ! Amwin, mi akout pa. La fatig i pèz amwin déja san sa.

MAFFIO

Sa i intérès pa ou, Gennaro, lé normal sa. Ou sé t'in bon kapitène lavantir. Ou port lo non in fami fantézi. Out moman, out papa, ou koné pa. Out fason tienbo kouto i di ou sé t'in moun, soman sèl zafèr i koné su out noblès sé k ou batay kom lion. Su mon kèr, nou lé dalon la gèr, mi di pa sa pou blès aou. Ou la sov mon vi koté Rimini, mwin la sov lè vot desi le pon Vinh-Sanché. Nou la juré na done anou la min dann batay kom dann lamour, vanz l'inn-a-lot si la bézoin, mon zénmi rienk lé vot, out zénemi rienk lé miène. Dovinèr la fine di anou na mor minm zour é nou la pèy ali 10 sékin an lor pou son prédikasion. Nou la pa dalon, nou lé frèr. Mésoman out bonèr ou port soloman Gennaro, san pèrsone dann out kèr, san malér la fami souvan i done, i kol bann non listoir. Ou lè anlèr ou. Ou la pa lèr ansanm sat i spas, ou sat la s'pasé, tank nana bonom pou batay é fanm pou lo plézir. Kosa i fout aou zistoir bann fami, bann vil ? Anou, ou wa Gennaro, la pa parèy nou okip bézman dan la kour koméla, akoz nout papa nout moman lé pri dann tramay zistoir malér. Lo kèr kaziman tout nout fami i ségn ankor. Di anou sat ou koné, Jeppo.

GENNARO (i sot dann dann fotèy, paréy in moun i sa kapoté.)

Wa fé lèv amwin lèr Jeppo nora fini.

JEPPO

Ala ! Té an katorz san katrevin....

GUBETTA, (dann in kwin téat.)

Katrevin-di-sèt.

JEPPO

Sa minm. Katrevin-di-sèt. In sértin soir rant mérkrédi é jedi.

GUBETTA

Non. Rant mardi mérkrédi.

JEPPO

Sa minm minm. La nuit-la, parlfèt, in sharoyèr le Tibre, lavé dor su son kanot, dan la longèr, pou véy dési son bazar, la war inn afèr i fé pèr. Lété zis desou légliz Santo-Hieronimo. Posib lété sink èr d'tan apré minuit. Le boug la vu monté, dann fénwar, su somin koté gosh légliz, dé boug té ki marsh, té bék a droit a gosh, kom in traka té may azot…