Maloya pou dor vant anlèr si la plaz la Mariane

Bébét Tout, lo kèr la zamé bliyé

M’la fane koulèr dann la plime son kolé,

I kour dan mon do an shapé.

La, dann lantouraz tout lo bann lantèrman,

Moin la mazine sré bon arkoz mon téstaman,

Kado kozman dérnié minit.

Tranpé dan lank blé la Tét Malbar loséan

Mouyé moué kalam, mon varsial la loi,

Sanm out pli zoli lékritir,

Marké sak i fodré i ariv pou mon kor

Lérk mon lame sanm li lé dé sar pi dakor

sof si insèl trin : i sépar.

Kan mon lame sar fine prann lélan lorizon

Par koté sat Ti-Jean, koté sat Ti katorz,

Sat bann Rico, bann nénène,

Fodra ousa li la énèt ramène mon kor

Dann in boeing « Paris-Loséan Indien »,

Dernié laré la gar Sin-Pol.

Kavo mon fami, in ya, sa la pa nèv.

An tia-tia wa di, lé bonbé lé bonbé,

E, avan zamé inn i sort déor,

I riskab tonm tar, amoin moin la pa kapab

Di so bann zangoun la « Oté, dékal in pé !:»

La zénès lo tour, dan in sértin fason.

Zis a koté bor d’mèr, in pié koté dolo blé,

Fouyé, si i gingn, inn ti trou koton,

In bon bon ti ni ti ni minm,

Dann ron marsoin, sa kamarad tanm-ti,

Longèr la bé ousa la sab sitélman fin

Dési la plaz noir la Mariane.

Sa in bordaz ousa, minm dési son zérgo,

Néptune i gonf gonf pa tro son gro zabo,

Ousa, kank bato pou koulé

Lo kapitène i kri : « Amoin lo shèf kanot !

Shap sat lé kap : do vin avèk lo ronm promié

Shakinn son damejane, tienbo larg pa.

Sa térla, lontan, kinz an fini pasé,

Dan laz ousa zoué tousèl la pi asé,

Moin la konèt promié zamourèt

Kosté sanm in sirène, in fanm-pwason,

Lamour la done amoin son promié loson,

Moin la anval lo promié zarèt.

Shapo tiré dovan Charles Leconte de Lisle

Amoin, zouar tanbour, apré li mi mèt ankor,

Lo bon mét i éskiz mon pardon,

Kim son poèm na plis la valèr ke lè miène,

Mon fonnkèr sar pli barbar ke lé siène

wati-watia, ladi lafé.

Tonm-la lé gratiné rant lo sièl ék dolo,

i done arpa lo tablo gomaz la tristès

Mé in léfé gingn arpa di kèl.

Avann bégné fanm wa sèrv an paravan

pou shanz zot linz, épi bann ti zanfan

va di : « Gayar : In shato la sab ! »

Si la pa tro domandé.. ! Dési mon ti bout la tèr

Planté, mi an supli, in léspès tamarin,

Tamarin lé o, mon préférans,

Sa wa anbar kont linsolasion

Pou mon dalon koté mon karo

Shapo tiré dési lo kèr.

Tanto dopi Mada, Tanto dopi Moris

Ranpli sanbon, plin la muzik zoli

Lo van zalizé, lo van Tsimilo

Si mon dérnié soméy va larg inn dé léko

In zour in maloya, in zour in lér séga

In lèr kadri, in vals salég…

E kan, dési mon séon kom dési loréyé,

Léspri dolo va ni dor zantiman

San shomiz, san boulouz

Mi di tout suit Jésus, éskiz mon pardon,

Si lonbraz mon kroi i alonz in pé dési

Pou trouv bonèr apré la mor.

Roi la mizér, Faraon la mizér.

Napoléon la mizér !

La mizér bann fine alé i dor dann Panthéon !

La mizèr bann sann lansan !

Wa ral in pè lo kèr dovan gran dalon la sézon

Ia pou fé pédalo si la vag pou révé

La mor pou li sa gran vakans.

Za ral in pè lo kèr dovan létérnèl dalon la sézon

Ia pou fé pédalo si la vag lèr li rév

La mor pou li sa gran vakans.