Shato dolo

Li lavé télman atann sa. La semène la pas an lapné, télman navé travay. Li lavé siport son sor kèr klèr akoz li té koné, lindi konzé. Lindi, li té kont vol somin. Li té oi dézà lalé pavé, koté kanal dolo kristal i rouv somin ziska gran Shato Dolo. Dolo i shant dosou lo sièl, lavé koul son romans dann son zoréy zour an zour. Rienk sa té koman promès kapab fé viv ali si inn ti niaz malgré tout traka son bann dosié.

Ièr soir ankor li noré émé kapot dann soméy vitman komsala lo zour i ariv pli bonèr, mésoman li navé tro léksitasion pou gingn soméy. Lavé pa bézoin férm lo zié pou komans rév lo spa, lo hamam, lo pisine. Lo fé fré, lo fé sho. La limièr lo sièl par dérièr la bé vitré solarium. Lo fré fré minm. Lo sho sho minm. Son lanb té paré, son sérvièt, son liv, son lastik shevé, son sanbon, son mayo d’bin, son karé sokola, tout té paré. Dann son li, dizon inn ti fiy i atann lo matin d’Noël pou rouv son kado.

Tèrba lé ankor pli gayar kaskad basin Kormoran, ankor pli gadianm ke pisine la mèr Boukan Kanot, pli bandé ke Manapany, pli o Silaos. Antouléka kan li té térba, li té mazine tout bann koin paradi mayé ann innsél. Epila li té alonz an transh papay dési son shèz romin. Lo lindi anpliskesa nana poin pèrsone, ali minm la rène Shato Dolo, prinsès Marok. Li té fièr kom Kléopat, koté bondié paréy Néfertiti.

Na poin rien pou ranplas sa. Maziné lé pa sifizan. Mazine tank ou i vé, ou va tronp out léspri mé lo kor va kri ankor, pars avann tonm kom inn poz pou lo kèr lé in lékspérians pou tout bann sans. Gét roflé soléy dési dolo, son ti dansé, i fé dans la zoi. Akout dolo i dor, i fé dormi. Lodèr té la mant i boui i fé dovine son gou. Sinonsa kafé griyé. La po, gondé sanm la vapèr, sézi dann so, drapé dann dolo, i sék a lèr si ti kousin. E lo gou ti vèr dolo, pur. Aprésa. Lo glason.

Rienk maziné, son sové i gonf dolo, i vien lour si son zépol. Li tourne la têt si son zoryé, koté lo mir. La radio i tourn. In nouvèl la vol son soméy, son rév, son sourir, la foulkan ansanm. I gingn arpa alé. I gingn pu. Lindi tout i tak baro. Lindi, pèrsone sort pi. Bin la koman i fé la ? Lé pir k’in siklone.

I rés rienk an mazinasion lo paké sové dolo si balans son zépol. Nora poin rien pou ranplasé. Sar pa son sal de bin, sar pa son shodièr, sar pa son bril-parfin, son Nespresso, son shèz-long va ranplas son shato. Odrémié pi pansé. Narté méyèr li lavé zamé konét.

#zistoir