DOLO LÉ LA

La limièr,

La limièr lé fasil fabrik la limièr.

Dolo lo nafėr.

Dofé i fé lontan ni koné fé dofé,

Mésoman dolo...

In zékli dofé nasé pou done dofé

In grin dolo i fé pa dolo.

Kosa in grin dolo ?

Kosa in grin dolo na poin

Si na la vi dann grin dolo ?

Dolo lé la

I gréne i dégréne i tonm i shaboul

i kony si la tol

Dernié dégou dernié minm

Apré na pi

Inn plis inn, inn !

Dé gout ansanm i done insél goute

Troi ansanm i done inn minm.

Akoz in goute dolo la pérs pilon

Dolo i trouv pa zamé son plas

Dolo lé la

In koté i mont lot koté i désann

An minm tan

I mouy i sèk

In goute dolo avék in goute dolo

I batay pa

i mélanz

I fonn lo kèr ansanm

Dé plis dé i fé inn

Kat plis kat i fé inn

Uit plis uit i fé inn

Dolo lé la

Mi mars pa tousél Mi rod mon kamarad Mi rod mon bann Amoin tousèl moin la pa rien Aou sanm moin, ali sanm moin Nout tout ansanm Zot i larg pa moin Banna i larg pa nou Dolo i tienbo Ousa la parti ? Ousa la pa pasé ! Ousa i sort ? Ousa i sava. Dopi toultan i tourn I tourn pou toultan Dopi lo sièl ziska lo sièl Dopi la tèr ziska la tèr Dopi la rivièr ziska la rivièr Dopi la mèr ziska la mèr

Dolo lé la

Kanal manfou pa mal

Tiyo i tié pa

Robiné lé fé pou rouvèr

Wa koup amoin mi mor arpa

Anzol amoin ma rèt trankil

Anbar amoin tan ke ou i gingn

Pa tan k'ou i vé.

Ma pa gramoun

Ma pa baba

Moin na poin laz

Lo tan i pran pa dési la rozé

Si la pa dolo

Flèr na poin flèr

Si la pa dolo

Poin rien pouss pa

Si la pa dolo

Boir i boir pa

Kel kaskad kel bassin

Si la pi la pli

Kel koko kel filao

Si na pi