Et mon coeur dans tout cela ? Cie Morphose

Pars i koné pa kosa domoun i wa dann sat ou amont

Pars i koné pa kosa domoun i pran dan sat ou i done

In karé dolo

Inn ti gine la limyèr

Nasé pou fé viv la vi

In kor i énét

Dann la limièr dolo

I roénét somanké

Somanké i pran lo kor

In lame an bourzon fanzan i komnas i bouz

Rienk la po i bouz, lo do kom la mèr an luil dann karé la maré

Zépol i lèv, i roul

Zomoplat i kart, i fèrm, i kant dousman

dousman minm

I révéy an baba

la pokor révéyé

la pou révéy in kor atèr

dann karé dolo, dann ti gine la limièr

Akokiyé, na poin la zanm, na poin lo bra, na poin la tèr

Na poin la zanm ziska lo pié i point karté

Ma vi sa kom in plan pou pousé, la flèr lankor loin trouv son lodèr

rienk lo grène i zèrm, rienk la kok dozéèf i krak

Komsi lo zié la pokor rouvèr

komsi karé dolo : lo vant momon, magma mater

Koman lé dir pou la vi rant dann in kor, pou abit lo kor

Pou lame i konpran son kor

Avan in bouzé d’nir in mouvman

Konbiensa lo tan

Avan konpran son kor

avan dékouv ali

avan pran tout la plas son kor, tout son longèr, tout son larzèr, son kalité

Avann fé son plas par anndan.

Lo mouvman i dérouy, i fé égzist léspas, i rouv la port lo tan

Wa roul-roulé, wa kapat-paté

Promié dobouté pormié volé

Par déor dolo

Dann fon fénoir

Tousèl ankor pou démay lo kor

Arpil lo kor pilé, armét an plas, trouv la ligne

Dobout

lo rin i trouv son plas, la tét i dobout son tour

Dézièm volé

Pa kapab solman i mor

Komsi lo tan tand tan m’ti

lanfans lo kor dann lo mond, i rod son lékilib

la trouv lo kor

lo mouvman la dans i vien pli gran, tout i roul ron, tout i koul, la zèl i rouv, lé gadianm

Lo zié rouvèr i kour koté lo kèr i ral

Promié lélan, promié bordaz, sar pa l’dernié

Bonpé lélan, bonpé bordaz

Mé lélan lastik lo kèr i fé dans lo kor ziska lot

lot i oir pa

lot i kalkil pa lo kor

i kalkil pa lo kèr

Zika tank inn

inn i rouvèr

inn i pran

inn i èm

Komsi fine ariv lo tan zénzan

lo tan bonèr i ariv, lo tousélaz la fini, lame an flèr i bri.

Epila na la voi,

kozman domoun

Lo zié lé zot

lo zié na poin lamour

lo zié san la vi, san la koulèr

lo zié noir é blan

i tronp, i détronp

Ankor in volé i atann pa, ankor in bordaz i arfoul dann finfon fénoir

Fo fé ansanm, fo fé avék sak na poin,

fo gingn la koulèr an gran gan blan

épila fo ét fièr

Soman na pi rien i koul, na pi rien i roul, na pi rien rouv

I klok, i arklok, i blok, i ardépotol, ardéklok, i koins, i rouy,

i kas par anndan ti bout ti bout

la dans i dégrène, i shap an morso

i tik, i tak, i tok, i totok

komsi nir in moun i fé di défléri, fané

komsi domoun robo

Kafrine Mask Blan

Zén zan kranèz

Mésomansa na la dans i gingn débouzé

mésomansa néna la vi i soubat

néna karé dolo po bégné

pou lavé

pou roénét

zéklèr par zéklèr

an pli bandé, an pli vivan, ansanm la fors siklone, ansanm la puisans tonèr, ansanm mantra lo sièl, morgongnmon volkan,

lo krié pou di kri

pou di wa gingn gagné

La pa kapab otroman

Lélan i fini pa

i fini arpa zamé

Wa glis par andéor trounoir

wa plish la po la tèr par andsou

wa pèrs la toil makadam

pou artrouv la limièr

pou libèr lo kor

AKOZ NÉNA LO KÈR.