- Kisa ? - Daniel Honoré
- Fé Nét
- 12 juil. 2021
- 2 min de lecture
- Kisa ? - Daniel Honoré.
Saint-Benoît, Bras-Fusil, papa
Soléy i lèv a la mèr
Li koush a la montagn
Fé mazine la Chine, in promié péi.
Saint-Benoît, Bras-Fusil, papa
Daniel i énèt si la tèr
Son moman l’Afrique and Mada
Li zoué dan la kour zanfan kréol
Saint-Benoît son promié péi
Sin-Bénoi son péi maziné
Sin-Bénoi son péi roékri
Saint-Benoît son dernié péi
Dann kantine kanton
In marmay si zénou son papa
I zoué domino, i zoué mazong
Li la grandi dann la joi
Sin Bénoi bien dé foi
Té pét à rir, té kakay,
Akoz dann péi la
La vi vi lé bèl, la vi lé dir
- Kisa krakèr ? – Daniel Honoré
- Kisa kabarèr ? – Daniel Honoré
- Kisa la fé la politik ? – Daniel Honoré
- Kisa fonnkézèr ? – Daniel Honoré
- Li fé la poétik pli fork politik.
In rakontèr
zistwar listoir
zistwar zistoir
Lézand vérité.
Tèrla minm la sours zistoir
Pou roman-nouvèl
Pou roman-roman
Tèrla minm volkan lo mo
Karo kozman pou diksionèr
Tèrla minm la poz kanté,
la min, shapo, si koté
Gramoun boush ouvèr
té di lo tan
té di koméla
té di lontan
té di domin
Daniel marmay gingn pa sanpasé lo drib lo mo
Mèt balon dann filé
Sak té di li la marké
Dann karné la boutik
Na tro matématik
Li bat pa bob sanm lèstilo
Son karné maloya miltipli lo mo
Dovan tout lo bann shif
Marmay li kont pa
Déyèr tout lo bann shif
Gramoun i kont sa
- Kisa krakèr ? – Daniel Honoré
- Kisa kabarèr ? – Daniel Honoré
- Kisa la fé la politik ? – Daniel Honoré
- Kisa fonnkézèr ? – Daniel Honoré
- Li fé la poétik pli fork politik.
In rakontèr
zistwar listoir
zistwar zistoir
Lézand vérité.
Dir, lir, ékrir,
Konté
Par anndan bann shif
Par dérièr lo kont
Par dérièr lo non marké
Dan son karné
Listoir péi Sin-Bénoi
La komans marké
La komans konté
Dann kabar
Listoir in marmay Sin-Bénoi
La komans marké
La komans konté.
Kisa krakèr ?
Kisa kabarèr ?
Kisa la fé la politik ?
Kisa fonnkézèr ?
Kèl rakontèr zistwar ?
zistwar listoir, zistwar zistoir
Lézand vérité.
Commentaires