Koulér

Domoun i kakay

Kozman tia-tia

Mi antann pa

An vil i sharoy

Sakinn son shario

Mi oir pa lé ba

Amoin si an o

M’gét soléy

Dan ton zié

Ou va arni oir amoin

(wa’rni war amoin)

Na ka suiv santié,

(na ka suiv shanté)

somin m’la trasé i komans koté moin,

I fini ton koté.

Moin pa sé-zé-té-èr,

moin la pa pé-sé-èr

Ièr moin zoizo kardinal

Zordi piédboi flanbwayan

Domin frui létsi

Moin sapèl gran bonèr

Par anlèr niaz, zisk’atèr,

ziska pli ba k la tèr

Pli ba k batan-dé-lam,

ziska pli ba k la mèr

Zisk’astèr, mi shant sanm lo van

Inn foi d’lan

Fanblwayan

Si zordi

Na létsi

Lé bien tan, lé bien tan.

Rasine dopi nwayo

I kraz lo fèr, i fout dofé dann fèr

Si inn foi dan lané, la koulé

Di pa Grandiab, di pa lo diab, di pa bondié

Gran-Brulé d’la vi

la lav i lav ali.

Si dé foi dan lané,

la pété, la pété

Di volkan i rèv

In gran péi nèv

Di la tèr i rèv

li la arét tourné

Pou k lo tour soléy

Gét dan nout zié.