Papangèr
- Fé Nét
- 27 avr. 2020
- 2 min de lecture
Nénène la di lo gou vavang papang koné pa
Na pou soigné wa soigné, soigné i fé viv
Néna pou fé wa fé, fèr i vé viv
Zèt pa rien, doné
Briz pa, répar sak la kasé
Trouv moyen bèk in klé
Ramas sat i trouv
Dolor dann dolo
Bishik dann vouv
Piès santim in dodo
Dann lor na doulèr pikur guèp
La mèr na son garshanpèt
La monté okilé poison
Poulé dolo na son mèt
Domann makiyon
Lo gou vavang papang koné pa
Vi trouv vavang lé dou vou vi di
Vou la fine gout in bout, pou di ou la trouv son gou
Vavang dann la pat papang, li manz pa
Papang dann pié vavang, li rèv pa,
li dor pa, li dobout-gèt li véy
Véy pa si son bazar lé noir, son kanar lé pankor noir
Rod pa si papang lé kaniar, alé okup vout kanar
Vavang la pa papay, la pa pipangay
Papang pa va-t-an-gèr, pa vavangèr
Viv pa pou batay, batay pou viv
Viv pa pou travay, travay pou viv
Vi di sé viv viv san travay vou
Lo gou vavang papang koné pa
La pa soléy vid dann sièl i fé bri lo zié papang
Sé soléy lo zié papang i fé bri la vi
Lo sièl la zèl papang i rouvèr lorizon
Li pous pas sanm lavion
Papang tonm pa dann gob, na poin gob pou gob ali
I mat pa papang, la kol i kol pa li.
Touzour li ansort ali
Lo gou vavang papang koné pa
Li vol vol par isi
Papang i bèk i aprop son roiyom
Li vol vol par la ba
Papang i bèk i dépay son roiyom
Tout zoizo na son ni
Papang i bèk, i kas son koki
La ariv lo zour, fo mazine zordi
Kan variv la nuit, wa mazine ièr
In béko si lo kèr papa papang
In béko si lo kèr maman papang
In béko si lo kèr zanfan papang
Fine ariv in viè lèr
Commentaires